Мұғалімдерге үндеу«Аягөз ауданы білім бөлімі» ММ басшысы Әзімбаев Нұрғали Тлекқалиұлы . 2025 жыл
Құрметті ұлағатты ұстаздар!
Білімнің шамшырағын жағып, бала жүрегіне нұр құйған Сіздерге деген алғысымыз шексіз. Жыл бойы тынымсыз еңбек етіп, әр шәкірттің болашағына сәуле шашқан қажырлы қызметтеріңіз үшін зор ризашылық білдіремін. Сіздердің төккен маңдай терлеріңіз бен шынайы жанашырлықтарыңыз – ел ертеңінің берік іргетасы.
Міне, көктемді жаз ауыстырып, жаймашуақ күндермен бірге демалыс кезеңі де келіп жетті. Бұл уақыт – жай ғана тынығу емес, жан мен рухқа қуат сыйлайтын, шығармашылықпен шұғылдануға, жаңа идеялар мен шабыттар жинауға таптырмас сәт.
Демалыс барысында оқушыларымыздың біліммен байланысын үзбей, көркем әдебиеттер оқуға, табиғатты танып-білуге,ғылыми ізденіске баулып, рухани дүниесін байытатын тапсырмалар беріп, бағыт-бағдар көрсетулеріңізді сұраймын.
«Жақсы кітап – жан азығы» демекші, әр бала жаз бойы ең болмаса бір жақсы туынды оқып, ой түйіп, көрген-білгенін қорыта алса – бұл үлкен жетістік болмақ.
Сонымен қатар, өздеріңіз де осы тынығу мезгілін тиімді пайдаланып, пәндік және ғылыми-әдістемелік ізденістерге ден қойып, кәсіби өсу жолында бір қадам ілгері жылжисыз дар деген сенімдемін.
Қазіргі заман мұғалімі – тек білім беруші ғана емес, үнемі дамып, жаңарып отыратын зерттеуші тұлға. Шығармашылық – ұстаз болмысының биік өлшемі.
Ұлы Абай айтқандай, «Тегінде, адам баласы адам баласынан ақыл, ғылым, ар, мінез деген нәрселермен озады». Сіздер сол асыл құндылықтарды шәкірт бойына сіңіріп жүрген шын мәніндегі руханият шырақшыларысыздар.
Алдағы күндеріңіз тыныштық пен шабытқа, қуаныш пен көтеріңкі көңіл-күйге толы болсын. Дендеріңізге саулық, жанұяларыңызға амандық, кәсіби жолдарыңызға мол табыс тілеймін! Демалыстарыңыз сәтті өтсін, құрметті әріптестер!
Ізгі тілекпен,
«Аягөз ауданы білім бөлімі» ММ басшысы Әзімбаев Нұрғали Тлекқалиұлы
. 2025 жыл
https://www.instagram.com/p/DKqn946o7Lw/?igsh=MXFiazJkbWtscnc0
